విజ్ఞాన్ యూనివర్సిటీ-ఐఎండీ కీలక ఒప్పందం... ఏపీ రైతులకు అత్యాధునిక వాతావరణ సేవలు

ఆంధ్రప్రదేశ్ రైతులకు వ్యవసాయంలో అండగా నిలిచేందుకు విజ్ఞాన్ యూనివర్సిటీ ముందుకొచ్చింది. అత్యాధునిక, కచ్చితమైన వాతావరణ సమాచారాన్ని పొలం స్థాయిలోనే రైతులకు అందించేందుకు భారత వాతావరణ శాఖ (ఐఎండీ)తో కీలక ఒప్పందం కుదుర్చుకుంది. ఈ ఒప్పంద పత్రాలను ఢిల్లీలో విజ్ఞాన్ యూనివర్సిటీ వైస్-ఛాన్సలర్ ప్రొఫెసర్ కె.వి. కృష్ణ కిషోర్, ఐఎండీ కార్యదర్శి డాక్టర్ ఎం. రవిచంద్రన్ మార్చుకున్నారు.

ఈ ఒప్పందం ప్రకారం, ఐఎండీ తమ వద్ద ఉన్న అత్యంత కచ్చితమైన వాతావరణ సమాచారాన్ని 1-2 కిలోమీటర్ల పరిధిలో ఏపీఐల ద్వారా విజ్ఞాన్ యూనివర్సిటీకి అందిస్తుంది. ఈ డేటాను విశ్లేషించి, పంటల ప్రణాళిక, నీటిపారుదల యాజమాన్యం, పురుగుమందుల వాడకం, ప్రకృతి వైపరీత్యాల నుంచి పంటలను కాపాడుకోవడం వంటి అంశాలపై విజ్ఞాన్ రైతులకు నిర్దిష్ట సలహాలు, సూచనలు అందిస్తుంది.

ఈ భాగస్వామ్యం ద్వారా వాతావరణ శాస్త్ర పరిజ్ఞానాన్ని వ్యవసాయ పరిశోధనలతో అనుసంధానం చేస్తున్నామని విజ్ఞాన్ వీసీ ప్రొఫెసర్ కృష్ణ కిషోర్ వివరించారు. దీనివల్ల వాతావరణ మార్పులు, అకాల వర్షాలు, అధిక ఉష్ణోగ్రతల వంటి సవాళ్లను రైతులు సమర్థంగా ఎదుర్కోగలరని ఆయన ఆశాభావం వ్యక్తం చేశారు.

ఈ ఒప్పందంతో వాతావరణ శాస్త్రం, వ్యవసాయం, విపత్తు నిర్వహణ వంటి రంగాల్లో పరిశోధనలకు, విద్యా కార్యక్రమాలకు ప్రోత్సాహం లభిస్తుందని నరసరావుపేట ఎంపీ, విజ్ఞాన్ విద్యా సంస్థల వైస్ ఛైర్మన్ లావు శ్రీకృష్ణ దేవరాయలు తెలిపారు. విద్యార్థులు, అధ్యాపకులు, శాస్త్రవేత్తల మధ్య శిక్షణా కార్యక్రమాలు, పరిశోధన ప్రాజెక్టులకు కూడా ఇది దోహదపడుతుందని ఆయన పేర్కొన్నారు. ఈ ఒప్పందం ద్వారా వ్యవసాయ రంగంలో శాస్త్రీయ విధానాలను ప్రోత్సహించడం సులభతరం అవుతుందని నిపుణులు భావిస్తున్నారు.